Баянзүрх дүүргийн нэгдүгээр хорооны нутаг дэвсгэр ерөнхий боловсролын 48-р сургуулийн хажууд байсан хашааг буулгаж, хашаанд байсан нүхэн жорлонг булахаар болжээ.
Сургуульд ойрхон нүхэн жорлон байх нь хүндрэлтэй. Хүүхдүүд танхимаар хичээллэхэд урин дулааны цагт цонхоо онгойлгоход өмхий үнэртдэг, жорлонгийн хог сургууль руу хийсдэг байсан. Иймд хашааг буулгаж, нүхэн жорлонг булахын тулд сургуулийн захиргаанаас хөөцөлдсөн боловч сүүлийн гурван жилийн хугацаанд энэ асуудал шийдэгдээгүй. Энэ удаа I хорооны Засаг дарга, мэргэжлийн хяналт, дүүргийн Газар зохион байгуулалтын албанд хандсанаар асуудлыг хоёр сарын дотор шийдвэрлэж өглөө хэмээн тус сургуулийн захирал Б.Эрдэнэчимэг ярилаа.
Нүхэн жорлон бүхий хашаалсан 390 ам.метр хэмжээтэй уг газар 2010 онд Баянзүрх дүүргийн Засаг даргын захирамжаар таван жилийн хугацаатай иргэний эзэмшилд шилжсэн боловч газрыг ашиглаагүй юм байна. Газар чөлөөлөх ажлыг Нийслэлийн газар зохион байгуулалтын албанаас хийсэн бөгөөд чөлөөлсөн талбайг тохижуулан нийтийн эзэмшлийн зориулалтаар ашиглах юм байна.
“Нүхэн жорлонг хоёр үе шаттайгаар ариутгаж, хөрсөнд аюулгүй болсны дараа булна” гэж I хорооны Засаг дарга Г.Чинбат мэдээлэв. Баянзүрх дүүргийн I хороо нь 3000 өрх, 10 мянга гаруй иргэнтэй. 48-р сургууль нь 4300 сурагчтай бөгөөд модон хашаа унаж, хадаас нь ил гарсан байх зэрэг хүүхэд явахад аюултай нөхцөл үүссэн байжээ.
