Монгол Улсын Ерөнхийлөгч У.Хүрэлсүх Монголын үйлдвэрчний эвлэлийн холбоо (МҮЭХ)-ны ерөнхийлөгч Х.Амгаланбаатар болон тус холбооны удирдлагуудыг хүлээн авч уулзлаа.
Монгол Улсын Ерөнхийлөгч хөдөлмөрчин хүний эрх ашгийг хамгаалах, цалин хөлс, нийгмийн асуудалд нь анхаарах, үйлдвэрчний эвлэлийн байгууллагыг бэхжүүлэхэд МҮЭХ-той хамтарч, бүх талаар дэмжихээ илэрхийлэв. Мөн 1999 оноос хойш өөрчлөгдөөгүй Хөдөлмөрийн тухай хуулийн шинэчилсэн найруулгын төслийг УИХ хэлэлцэн батлахад МҮЭХ-ны хүчин зүтгэл их байсныг тэмдэглэв. Ирэх сарын эхээр зохион байгуулах цар тахлын эсрэг төр, хувийн хэвшлийн зөвлөгөөнд МҮЭХ оролцож, байр сууриа илэрхийлэх нь зүйтэй гэж үзэж байгаагаа онцолсон юм.
Ерөнхийлөгч У.Хүрэлсхийг Монгол Улсын Ерөнхий сайдаар ажиллаж байхдаа МҮЭХ-той нягт хамтран ажиллаж байсныг МҮЭХ-ны ерөнхийлөгч Х.Амгаланбаатар тэмдэглэлээ. Түүний дотор дөрвөн төрлийн татварын нэмэгдэл, нийгмийн даатгалын шимтгэлтэй холбоотой асуудлыг иргэдэд ээлтэй байдлаар шийдсэнд талархлаа илэрхийлэв. Мөн Хөдөлмөрийн тухай хуулийн шинэчилсэн найруулгын төслийг УИХ-аар батлуулахад хүчин чармайлт гаргасныг онцоллоо. Цаашид энэ хуулийн хэрэгжилтэд анхаарах, Нийгмийн даатгалын багц хуулийн төслийг УИХ одоогийнхоос дордуулахгүй батлахад анхаарахыг хүсэв.
МҮЭХ-ны төлөөлөгч нар үндэсний бүтээмжийн хөдөлгөөн өрнүүлэх, төрийн өмчит болон компаниуд ажилчиддаа хувьцаа эзэмшүүлдэг байх, боловсролын салбарынхны цалинг дундаж цалингийн хэмжээнд хүргэх, нийгмийн асуудлыг нь шийдвэрлэх зэрэгт дэмжихийг хүслээ.
