Монгол улсын засгийн газраас 2021 оны тавдугаар сарын 19-ний өдөр УИХ-д өргөн мэдүүлсэн хүний хувийн мэдээлэл хамгаалах тухай хуулийн төслийг байнгын хорооны болон чуулганы нэгдсэн хуралдааны хэлэлцүүлэгт бэлтгэх үүрэг бүхий ажлын хэсэгт мэргэжил арга зүйн туслалцаа үзүүлэх дэд хэсгийн хуралдаан өнөөдөр буюу есдүгээр сарын 07-нд боллоо. Ажлын дэд хэсгийг УИХ-ын хууль зүйн байнгын хорооны ахлах зөвлөх М.Үнэнбат ахалж байгаа бөгөөд бүрэлдэхүүнд үндэсний аюулгүй байдлын зөвлөл, хууль зүй дотоод хэргийн яам, тагнуулын ерөнхий газар, цагдаагийн ерөнхий газар, улсын бүртгэлийн ерөнхий газар, харилцаа холбоо мэдээллийн технологийн газар, харилцаа холбооны зохицуулах хороо болон төрийн бус байгууллага, мэргэжлийн холбоодын төлөөлөл багтжээ. Ажлын дэд хэсгийн хуралдаанд ХЗДХЯ-ны хууль зүйн бодлогын газрын дарга П.Сайнзориг, цахим хөгжлийн үндэсний хорооны ажлын албаны дарга С.Тэнгис, ЦЕГ-ын хуулийн хэлтсийн дарга, хурандаа Л.Нямдаваа, судлаач Д.Онолт болон албаны бусад хүмүүс оролцож, хуулийн төслийн зүйл, заалт бүрийг нарийвчлан ярилцлаа. Тус хуулийн төслийг www.parliament.mn цахим хуудаст байршуулсан бөгөөд холбогдох саналаа ажлын хэсэгт ирүүлэх боломжтой гэж УИХ-ын хэвлэл мэдээлэл, олон нийттэй харилцах хэлтсээс мэдээллээ.
