“Apple” компани “Apple Watch”-ийн шинэ загвараа аравдугаар сарын 15-наас худалдаанд гаргахаар боллоо.
Мөн урьдчилсан захиалгыг энэ баасан гарагаас эхлэн авахаар төлөвлөсөн байна. “Apple Watch Series 7” шинэ загвар нь өмнөх загвараасаа 20 хувиар илүү том дэлгэцтэй болсон аж. Мөн 33 хувиар илүү хурдан хугацаанд цэнэглэгддэг болжээ. Үүнээс гадна дэлгэц нь 70 хувиар тод дүрслэлтэйн дээр илүү бат бөх, хамгаалалт сайтай болсныг тус компани онцолж байгаа юм.
“Apple Watch Series 7”-ийн худалдаалагдах үнэ 399 ам.доллароос эхэлж байна. Цагны үнэ материалаасаа шалтгаалан өөр, өөр байх ба өмнөх загваруудын оосор шинэ загварт таарах болно. “Apple Watch Series 7” нь хар, цагаан, ногоон, цэнхэр, улаан гэсэн таван өнгөөр худалдаанд гарах бөгөөд хөнгөн цагаан, ган, титан гэсэн материалуудын сонголттой байна.
