БОАЖЯ, Улаанбаатар хотын Захирагчийн ажлын алба, НМХГ, “Таван Толгой Түлш” ХХК-иас нийслэлийн агаар, орчны бохирдлын талаар мэдээллээ.
Тавантолгой түлш компанийн Чанарын хяналтын хэлтсийн дарга Л. Баттулга" Засгийн газрын хуралдаанаар сайжруулсан түлшний чанарт шалгалт хийж, лабораторийн дүгнэлт гаргах ажлын хэсэг байгуулж үзлэг шалгалт явуулсан. Дүгнэлтээр сайжруулсан шахмал түлшний үйлдвэрлэл стандарт хэвийн гэсэн дүгнэлт гарсан. Сайжруулсан түлшний гол түүхий эд мидлингийн шинжилгээний дүн бүгд стандарт хэмжээнд буюу хэвийн байна. Мөн айл өрхөөр түүвэрчилсэн шалгалт хийсэн. Шалгалтаар сайжруулсан шахмал түлшний чийгний хэмжээ их байсан тохиолдол гараагүй. Шахмал түлшний чийг 10 хувиас дээш гарахгүй байх стандарт мөрдөгддөг бөгөөд бид 5-6 хувьд барьж ажиллаж байна" гэв.
Орчны бохирдлыг бууруулах үндэсний хорооны ажлын албаны дарга Б.Алтанзул" Өнгөрсөн долоо хоногийн Пүрэв, Баасан гарагт агаарын чанар сайн байсан. Энэ нь салхитай байсантай холбоотой. Харин амралтын өдрүүдэд агаар бага зэргийн бохирдолтой байлаа. Өнөө өглөөний 09:00 цагийн байдлаар Улаанбаатар хотын ихэнх цэгт агаар бага бохирдолтой, дундаж хэмжээтэй байна. Агаарын чанарт тээврийн хэрэгсэл болон цахилгаан дулааны станцууд, түүхий нүүрс, цаг уурын буюу инверс нөлөөлж байна" гэлээ.
"Таван толгой түлш" ХХК-ийн Нүүрс боловсруулах үйлдвэрийн дарга Х.Галымбек " Манай компанийн зүүн, баруун бүс нийт 22 шугамаар үйл ажиллагаа явуулдаг. Үүнээс 17 нь тогтвортой ажиллаж байгаа бөгөөд гурав нь засвартай, хоёр нь нөөцөд байгаа. "Тавантолгой түлш" компани сайжруулсан шахмал түлшийг боловсруулахад үндсэн гурван технологи ашигладаг. Нэгдүгээрт барьцалдуулагч, хоёрдугаарт, уураар халаах, гуравдугаарт уураар хатааснаа дахин хатаах гэсэн технологийг хангаж ажиллаж буй. Стандартын хувьд чанарын хяналт шалгалтыг байнга хийдэг учир ямар нэгэн асуудал гараагүй" гэж мэдээллээ.
