Арабын нэгдсэн Эмират улсын Дубай хотноо 2022 оны хоёрдугаар сарын 21-27 болсон пара байт харвааны ДАШТ-ий эмэгтэй багийн төрөлд Д.Сэлэнгээ, Б.Жавхлантөгс нар хүрэл медаль хүртлээ. Манай харваачид урьдчилсан харваалтаар 5-д эрэмбэлэгдсэн бөгөөд эхний харваанд Туркийн багийг 5:4-р хожиж, хагас шигшээд үлдсэн. Улмаар чансаагаар тэргүүлсэн ОХУ-ын багт 6:0-р дийлдэн хүрэл медалын төлөө харвах болсон юм. Тэд медалийн төлөө Энэтхэгийн хүчтэй багийг 5:1-ийн харьцаатай ялж пара байт харвааны ДАШТ-ий анхны медальтнууд боллоо. Энэ удаагийн “Дубай- 2022" пара байт харвааны ДАШТ-д Монгол Улсаас зургаан хүний бүрэлдэхүүнтэй баг оролцсон юм. Дасгалжуулагчаар МБХХ-ны удирдах зөвлөлийн гишүүн, пара байт харвааны шигшээ багийн дасгалжуулагч Б.Золбоо ажилласан бол багийн орчуулагч, албаны хүнээр Шүүгчдийн зөвлөлийн дарга Ц.Нямхатан оролцжээ.
