Спортын төв ордоны дэргэдэх Спортын сургуулийн сурагчид гадаа талбайд бэлтгэл хийж байхтай таарлаа. Гадаа дулаан болсон учир ийн бэлтгэл хийж байгаа ба хүүхдүүд ч үүндээ сэтгэлт ханамжтай байгаа нь ажиглагдаж байв. Манай сурвалжлах баг сурагч хүүхдүүдтэй уулзаж ирээдүйн зорилго, бэлтгэлийн ач тусын талаар бяцхан хөөрөлдснөө толилуулая.
Олимпийн наадам, Азийн тоглолт, тив, дэлхийн аварга шалгаруулах тэмцээн болон олон улсын томоохон уралдаан, тэмцээнд Монгол Улсын нэр хүндийг өндөрт гаргах ур чадвартай өндөр зэрэглэлийн тамирчдын залгамж халааг тасралтгүй бэлтгэн гаргах, Биеийн тамир, спортын мэргэжилтэн бэлтгэх суурь боловсролыг олгох асуудал эл Спортын сургуулийн үйл ажиллагааны онцлог аж.
Тус сургууль нь спортын 14 төрлөөр өсвөрийн тамирчдыг бэлтгэн гаргах зорилт тавьсан байна. Нийт 10 төрлөөр 200 гаруй сурагчдыг сонгон шалгаруулан авсан юм. Үүнд 6.7.8.9 дүгээр ангиудын хүүхдүүд элсэх боломжтой бөгөөд зургадугаар ангийн бүлэгт шатар, даам, ширээний теннис, хөнгөн атлетик, хөл бөмбөг, гимнастикийн төрлөөр хичээлэх охид, хөвгүүд орсон байна. Сагсан бөмбөг, чөлөөт бөхөөр хичээлэх охид, хөвгүүд долдугаар ангид, Сонирхогчдын боксоор хичээллэх хүүхдүүд наймдугаар ангид, чөлөөт, жүдо бөхөөр хичээллэх хүүхдүүд есдүгээр ангидуудад сурч эхэлжээ.
