Өнгөрөгч амралтын өдрүүдээр Нийслэлийн Хан-Уул дүүргийн ИТХ-ын дэргэдэх Гэмт хэргээс урьдчилан сэргийлэх ажлыг зохион байгуулах салбар зөвлөл, мөн Гамшгийн эрсдэлийг бууруулах орон нутгийн зөвлөл, Монголын явган алхалтын холбооны гишүүд Богдхан ууланд аялаж, явган алхаж байгаа иргэдэд зориулан "Хүн бүр байгаль хамгаалагч" уриан дор мэдээлэл, зөвлөгөө өгөх өдөрлөгийг зохион байгууллаа.
Хүн бүр байгаль дэлхийдээ ээлтэй хандаж, хайрлан хамгаалж, хог хаягдалгүй аялладаг байхыг уриалж, ой хээрийн гал түймэр, бусад төрлийн эрсдэлээс хэрхэн урьдчилан сэргийлж болох талаар практик мэдлэг ойлголт өгсөн үр дүнтэй арга хэмжээ боллоо. Тус дүүргийн Онцгой байдлын хэлтсийн албан хаагчид ой хээрийн түймэр, бусад төрлийн осол аваарын үед хэрхэн ажилладаг талаар сургалт орж, иргэдтэй хэрхэн хамтран ажилладаг талаар мэдээлэл өгсөн нь ихээхэн чухал ач холбогдолтой байлаа.
Улаанбаатар хот орчимд, ялангуяа нийслэлийн Хан-Уул дүүргийн нутаг дэвсгэрт явган алхагчид нэлээдгүй аялаж, иргэд салхинд гарч, зугаалдаг бүс нутаг элбэг бөгөөд зөвхөн Богдхан уулын Дугуй цагааны ойн цоорхойн чиглэлд өдөрт дундажаар 1000 орчим хүмүүс алхдаг ажээ. Мөн Богдхан уулын Хүүш, Арцат, Жаргалант, Түргэн, Манзушир, Ташгайт, Нүхт, Чандмань гээд олон чиглэлд иргэд алхаж зугаалахын зэрэгцээ жил бүр самарчид ойн гүнрүү нэвтэрч ойн эко-системд нөлөөлж байна. Тиймээс хүн бүр байгаль хамгаалагч гэсэн ухамсарыг сэрээж, ховордсон ан амьтад, ургамалыг хайрлан хамгаалж, нөхөн сэргэх боломжийг олгож, эх дэлхий-хүн хоорондын хүйн холбоог таслахгүй байхад анхаарах шаардлагатай байна.
Монголын явган алхалтын холбоо нь Хан-Уул дүүргийн ИТХ-тай хамтран жил бүр "Хариуцлагатай алхагч-Алхалтын удирдагч" бэлтгэх цогц сургалтын хөтөлбөрийг зохион байгуулдаг бөгөөд хамрагдсан гишүүд нь бусад явган алхагч нарт хариуцлагатай алхах, аялах мэдлэг, ойлголтыг түгээж нөлөөллийн ажлуудыг амжилттай хэрэгжүүлж байна.
Иргэд та бүхнийг www.facebook.com/groups/MongolWalkers цахим групт нэгдэж "Хэрхэн хариуцлагатай, байгаль дэлхийдээ ээлтэй алхах" талаар мэдлэгтэй болж, алхалтын хөтөлбөрүүдэд нэгдэхийг уриалж байна.
