ӨСВӨР ҮЕИЙНХНИЙ ДУУ ХООЛОЙ ярилцлагын буланд маань Хэнтий аймгийн Дэлгэрхаан суманд амьдардаг Түвшинтөгсийн Энхтулга дүү маань оролцсон юм. Тэрээр тэшүүрийн спортоор хичээллэж өөрийн хоббигоо болгон улсын тэмцээнд тэргүүн байр эзэлж амжилт үзүүлсэн нэгэн билээ. Спортоор хичээллэхийн ач тус хэрхэн шантрахгүй тууштай байх талаар ярилцсан сонирхолтой ярилцлагыг уншигч та бүхэнд хүргэж байна.
Өсвөрийн тэшүүрийн улсын аваргад түрүүлсэн Т. Энхтулга дүү маань хичээллэдэг спортоо хэрхэн хоббигоо болгосон талаар ярилцлаа.
Сайн байна уу? Чамд энэ өдрийн мэнд хүргэе! Манай уншигчдад өөрийгөө танилцуулаач
Сайн байцгаана уу намайг Түвшинтөгсийн Энхтулга гэдэг. Би Хэнтий аймгийн Дэлгэрхаан суманд амьдардаг.
Хэдэн настай бэ? Хэддүгээр ангийн сурагч вэ?
Би 10 настай Дэлгэрхаан сумын сургуулийн 5-р ангид суралцдаг.
Гэр бүлийн байдал хэн хэнтэйгээ амьдардаг бэ?
Ам бүл зургуулаа аав ээж дүү эгчийн хамт амьдардаг.
Чөлөөт цагаараа юу хийж, хэрхэн өнгөрүүлдэг бэ?
Тэшүүр болон роллекоор гулгах дуртай өнгөрсөн 3 сард тэшүүрийн төрөлд улсын аварга болж амжилт гаргасан .
Тэшүүрээр хэдэн жил хичээллэж байгаа бэ?
Удаагүй байгаа хичээллээд 6 сар болох гэж байна. Өнгөрсөн 12 сараас эхлээд өдий хүртэл хичээллэж байна.
Бэлтгэл хийж байхад чинь хэцүү зүйл юу байв?Шантрах эсвэл больдог ч юм уу гэж бодож байсан уу?
Надад тийм зүйл огт бодогдож байгаагүй. Би өөрөө энэ спортыг маш их сонирхож байсан болохоор хэцүү зүйл байгаагүй гэж хэлж болно. Одоо ч уйгагүй бэлтгэлээ хийх маш их дуртай.
Тэшүүрээр хичээллэхийн давуу талаас дурдвал ?
Би өөрөө маш их сонирхож байсан. Давуу тал гэвэл цаг баримталж сурсан,тууштай бэлтгэлээ олон найз нөхөдтэй болж өөрийн гэсэн хоббитой болсон доо. Ер нь давуу надад их давуу талууд бий болж эхэлсэн цаашдаа ч улам сайжирна гэсэн тэмүүлэлтэй байна.
Хичээл бэлтгэлийн цагаа хэрхэн яаж зохицуулдаг бэ?
Би өглөө 10 цагт ирээд бэлтгэлээ хийж эхэлдэг. Манай хичээл өдөр 13-30-аас ордог. Тэгээд л бүтэн өдрийн турш завгүй байдаг даа.
Танай суманд тэшүүрийн спортоор нийт хэдэн хүүхэд хичээллэдэг вэ? Багшийх нь нэрийг хэн гэдэг вэ?
Манайд нийт хорь гаруй хүүхэд тэшүүрээр хичээллэдэг. Манай багшийг н.Сүнсэлтуяа гэдэг. Надад уйгагүй зааж зөвлөсний үр дүнд би амжилт үзүүлж чадсан даа. Энэ ташрамд багшдаа баярлалаа гэж хэлмээр байна.
Багш нь юу гэж зөвлөж захидаг вэ?
Багшийн захидаг үг гэвэл миний хүү таслахгүй бэлтгэлээ сайн хийнэ шүү ирээдүйд их амжилт гаргасан мундаг тамирчин болоорой гэж захидаг даа.
Улсын аваргад оролцоход ямар мэдрэмж төрж байсан бэ? Их сандарсан уу?
Маш ихээр баярлаж догдолж байсан. Сандарсан юм байгаагүй.
Тэмцээн нь дуусаад аварга боллоо гээд нэрийг нь зарлахад хамгийн түрүүнд юу бодогдож байсан бэ?
Миний нэрийг хэлэхэд нь сонсоод маш их баярласан. Ингээд л түрүүлчхэж байгаа юм уу гээд итгэж өгөхгүй их гайхсан шоконд орчихдог юм байна лээ \инээв\
Гэр бүлийн хүмүүс нь энэ спортоор хичээллэж эхлэхэд яаж хүлээж авч байсан бэ?
Аав ээж маань бэлтгэл хийж эхлэхэд дургүйцдэг байсан ч би зөрсөөр байгаад бэлтгэлээ хийдэг байсан. Идэвхтэй бэлтгэл хийсний ачаар Улсын аварга болж чадсан даа баяртай байна. Гэрийнхэн маань эхэндээ итгэхгүй байсан. Тайзан дээр 1-р байранд орчхоод зогсож байхдаа би үнэхээр догдолж үгээр илэрхийлэхийн аргагүй мэдрэмжийг авсан.
Цаашдын зорилго ойрын мөрөөдөл нь юу вэ?
Миний мөрөөдөл бол тэшүүрийн спортоор Монгол орны нэрийг гаргасан тамирчин болох мөрөөдөлтэй. Мөн ойрын зорилго гэвэл бэлтгэлээ сайн хийгээд олон олон тэмцээнд орж амжилт үзүүлнэ гэж боддог.
Үеийнхээ хүүхдүүдэд хандаж уриалга хэлээч!
За үеийн найзууддаа ямар нэгэн спортоор хичээллэж эхэлсэн л бол тууштай яваарай. Хэзээ нэгэн цагт амжилтад хүрдэг юм байна лээ шүү гэж хэлье.
Ярилцлага өгсөнд баярлалаа. Спортын болон сурлагын амжилт хүсье .Бэлтгэлээ сайн хийгээд мундаг тамирчин болоорой .
Баярлалаа танай хамт олонд бас амжилт хүсье.
